أهلا شباب،
انهاردة كلامنا هيكون عن حاجة مش متعودين عليها ولا كنت متوقع انها تكون بالروعة دي واللي تكاد تكون بتنافس تطبيقات عالمية .. تطبيق انستاباي.
انستاباي هو تطبيق اطلقه البنك المركزي المصري في نهاية مارس ٢٠٢٢ بهدف جمع كل حساباتك سواء حساب بنكي / محفظة إلكترونية / كارت مدفوعات ومرتبات ميزة في حساب واحد من خلاله تقدر تتحكم فيهم.
بناء على تجربتي الشخصية واللي فاقت توقعاتي، قدرت اني اضيف حسابي البنكي وأحول مدفوعات لمحفظة فودافون كاش في أقل من ٣ ثواني حرفيا، والأهم من دا كله إن الموضوع تم بدون أي مصاريف إدارية.
في حين إن نفس العملية حاولت اعملها من خلال فودافون كاش، تم خصم مبلغ عند الإيداع وكذلك خصم مبلغ آخر عند السحب ! ليه أعمل كل دا وأنا عندي تطبيق واحد بيقوم بعمل كل دا في ثانية واحدة.
من مميزات التطبيق انه بيوفرلك إيميل مخصص ليك، ممكن من خلاله أي حد في أي مكان في مصر أيا كان نوع حسابه البنكي أنه يحوللك المبلغ اللي انت عاوزه في أقل من ثانية.
الخطوة دي مهمة جدا ضمن المجهودات اللي الحكومة المصرية بتعملها لرقمنة كل شيئ، واللي هيسمحلنا في خلال فترة وجيزة إننا ندفع في السوبرماركت عن طريق الموبايل .. مجرد عمل مسح للكود وإدخال المبلغ المطلوب .. انت كدا دفعت !
الموضوع دا هيساعدنا اننا نضم الاقتصادات الغير رسمية للاقتصاد الرسمي ومعرفة حجم الأموال اللي مع كل شخص ودخله الشهري وغيره من الأمور اللي هتساعد الدولة في التخطيط والتنمية المستقبلية.
التطبيق موحود على جوجل بلاي وأبل ستور بشكل مجاني، والتسجيل فيه لا يأخذ دقيقة.
قولولنا رأيكم في التطبيق لو نزلتوه..
Comments
Post a Comment